Првиот блог кој го направив за Buzz, а кој беше поврзан со патики, беше посветен на Adidas Gazelle. Се разбира, со причинa. Покрај сите функции за кои сум програмиран, пред се за танцување, па потоа за кореограф, блогер, „бициклиста“, авантурист, понекогаш како кошаркар, тврд егоист и што уште не.
Како специфичен танцувач, b-boying од секогаш ми било најлесно, во комбинација со удобна, лесна и фанки облека, а совршениот склоп го открив на време, пред деценија ипол, кога почнав со првите чекори во брејкот. Татко ми секогаш имаше критики кон моите обувки во времето кога сечев сунџери за перење на коли и ги ставав под јазикот на патиката, за да ги „набилдам“ своите „раперски“ патики. Мислам дека посебно не му се допадна деталот со портокалови врвки, но доста е со моите мрачни тајни од минатото.
Коментарите: „Кога ќе купиш нормални патики?“, до оние „Погледни ги моите, ги имам 7 години и пак се како нови“, немав избор освен да ги пробам тие „прочуени“ патики на татко ми. Добро претпоставувате, фактот дека со истиот дизајн постојат уште од шеесетите години не е тешко да заклучите дека татко ми имаше баш Adidas Gazelle. Добро, не може баш тие од 1966 година, иако понекогаш изгледаше како да ги купил тогаш кога имал 2 години и од тогаш ги нема променето до денес.
Adidas Gazelle во почетокот на седумдесетите години беа носени од страна на Mick Jagger и Keith Richards, во деведесетите години едно време ги носеа и скејтерите, а најфанки карактер им донесе Michael Jackson со својата афро фризура и танцот од Jackson 5 eрата.
Jay Kay од Jamiroquai’s исто така го препозна фанкот во Gazelle патиките и од тогаш не ги соблекува. Љубителите на овој музичар веројатно знаат колку е тој познат по својот богат возен парк, па доколку некогаш сте се запрашале кои се најдобри патики за возење на Вашето Ферари, не мора понатаму да барате. Јас своите жолти Gazelle патики ги вклопив со жолто Ferari Spider. Kinder Surprise Ferari Spider.
Било како било, јас овој ноември ќе ги камуфлирам моите стапала со есенските бои на Gazelle.
